Galatians 5
Lolongöba Kraistpuk kinkin solanŋe kinme.
1Kraistnöŋ Köna keu bapŋeyök pösat neŋgiiga solanŋi maljin. Mewö mala tosatŋan iŋini kunbuk öröba Köna keugö mötöpnöŋ ▼▼Ip kembaŋi (yoke) mi bulmakau yahötkö jölŋire ala jöhögetka mindirim etkiiga miaŋön mohotŋe kare me gölmeqeqegö kinoŋ örömakzahot. Miaŋgö dop Köna keu gwarönöŋ maljan ewö, nupŋi mönö töp meman.
jöhöm eŋgibepuköra mönö galöm mem aŋguba malme. Welenqeqe omaŋi ewö akepuköra mönö köhöiba böŋ qeba kinme.2Mötket! Pol nöŋön kewö jibi mötket: Tosatŋan Anutugö aiwesökŋi sileŋine yandimegö mötketka imbi kölme ewö, Kraistnöŋ mönö bauköm eŋgimamgö osima. 3Keu mi toroqeba kewö naŋgöba jimam: Azi pakpak sileŋine aiwesök yandimegö mötketka imbi kölmei, yeŋön mönö Köna keu pakpak tem köla wuataŋgöme. Mi qahö wuataŋgögetka qahö dop kölma. 4Köna keu tem köla wuataŋgöba mewö miaŋön solanŋi akingö mötzei, eŋön mönö Kraistkö selŋi qösököba yambuk qahö toroqeba kinje. Eŋön mönö Anutugö kalem möriamŋi mosöta yaigep eta laŋ malje.
5Laŋ maljemö, neŋön mönö Anutugö jeŋe diŋdiŋi akingö jörömqörömŋi aka awöweŋgömakzin. Mewö ahinga Uŋa Töröŋan inahöm neŋgiiga Anutu möt narim waŋgiinga keunini jim teköi solanibingöra mambörakzin. 6Kraist Jisösbuk kininga urugö ölŋi mötnarip mi mohotŋan mönö bauköm neŋgimakza. Anutu möt nariinga inahöm neŋgiiga amqeba urukalem ak aŋguinga dop köljapmö, mötnarip ölŋi qahö mi qahö bauköm neŋgimakza. Mewöyök Anutugö aiwesökŋi silenine yandiget ahöza me qahö, mi mönö dop mohot akza. Silegö kun me kun mi Anutugö jeŋe qahö bauköm neŋgima.
7Mutuk uru meleŋmeleŋgö aoŋgitnöŋ mönahot ewö ösumŋinan anget. Ölöpŋanök angetmö, böhi takapulakaŋi kunöŋ kaba siksauk mem eŋgiba kembaŋe kutuiga keu ölŋi qahö toroqeba tem kölakze. 8Kun daŋön eŋgoholakzawi, yaŋön mönö kembaŋe kutumegöra qahö tutuhuba kuŋgum eŋgimakza. Mi qahö. 9Yist boromdökŋi kimbutnöŋ ala plauabuk meleŋninga körek pakpak meiga qariba wahörakza. Miaŋgö dop siksauk moröŋan mönö dop köl eŋgiiga körekmakörek jaŋjuŋ akepuk.
10Böhi takapulakaŋi yaŋön siksauk mem eŋgiiga jaŋjuŋ ahakzei, Anutunöŋ mönö yaŋgö ahakmemeŋaŋgö likepŋi meleŋ waŋgiiga sihimbölöŋi möta malma. Nöŋön Kembubuk kinda möt narim eŋgiba eŋgöra kewö möta awösamkakak akzal: Iŋini Kraistkö Buŋa keu törörök wuataŋgöba mötmöt murutŋi pakpak yaköribingö möt köhöiba malme.
11O urumeleŋ alaurupni, iŋini mewö malmemö, nöŋön Kraist maripomnöŋ kömuyöhaŋgö könaŋi jim sehibiga Juda yeŋgö uruŋinan miaŋgöra bölimakza. Maripomgö keuŋi mosötpileŋak ewö, mönö sesewerowero qahö ak niŋgibeak. Anutugö aiwesök azi sileŋine yandiyandimegö Buŋa keuŋi toroqeba jiba uru kuŋgum eŋgibileŋak ewö, mönö kahasililiŋ qahö ak niŋgibeak. 12Tosatŋan kuŋgum eŋgiba siksauk memakzei, yeŋön mönö yandiyandigö keuŋini wuataŋgöm teköba nanŋini sile kitipŋini körek yandim aŋgugetka mötpi dop kölbawak.
13O urumeleŋ alaurupni, Anutunöŋ iŋini köna walŋaŋgö keunöhök lolohoba gwaröŋini qahö malmegöra eŋgoholökmö, kewögöra mönö galöm mem aŋguba malme, “Mönö lolohoba solanŋi maljin,” mewö jiba möndöba uruŋinan wahöri silegö sihim kömbönaŋini bölöŋan mönö galöm köl eŋgibapuk. Nanŋini imbi-imbi qahöpmö, mönö urukalem qakŋe kinda welen qem aŋguba malme. 14Köna keu bohonŋi mohot wuataŋgögetka Anutugöreŋ keu pakpak mönö mewöyök ölŋinambuk akŋe. Keu bohonŋi mohok mi kewö, “Nangi jöpaköm aŋgumakzani, miaŋgö dop mönö ambazip pakpak urugan jöpaköm eŋgimakŋan.” 15Mewö jizapmö, bau kiam ewö aŋgöhöm söksök aka aumakze ewö, mönö nanŋini ayuhum aŋgubepuköra töhötŋini pöndaŋ möta malme. Mewö. b , c
Uŋa Töröŋan galöm köl eŋgiiga malme.
16Nöŋön kewö jimam: Uŋa Töröŋan mönö ahakmemeŋini galöm köliga malme. Mewö malgetka urusilegö sihim kömbönaŋini bölöŋi qei eri kude tem köla wuataŋgömakŋe. 17Miaŋgö könaŋi kewö: Urusilegö sihim kömbönaŋi bölöŋan mönö Uŋa Töröŋi qetala laŋ köpösöŋgöiga Uŋa Töröŋan uru walŋaŋgö kukŋi qemamgö möriga sutŋire jujul ahöi aumakzahot. Mewö aumakzahoraŋgöra eŋön yuai ölöpŋi aka membingö möta mi osimakze. 18Mi osimakzemö, Uŋa Töröŋan eŋguaŋgiriga anda malje ewö, mönö Köna keu bapŋe qahö malje.19Urusilegö ahakmeme walŋaŋgö nup ölŋi mi aukŋe ahöi mötzin. Mi kewö: Kaisero namböŋnamböŋ laŋ aketka uruŋinan tölöhoiga serowilin ahakze. 20Tandö lopioŋ waikŋini memba bemŋini möpöseim eŋgigetka uruŋini sölölöhöm eŋgii suŋa jinaŋ ahakze. Kerök asuhui aŋgururuk aka aumakze. Kungöreŋ yuaigöra urunöŋ mututqutut möta eröm ota yom jiba urusiŋgok ahakze. Nanŋinaŋgörök mötmöriba yuai öröba giriŋjabak memakze. Jula mendeŋ aŋguba kambuŋi kambuŋi ala jijiwilit ak aŋgumakze.
21Tosatŋi yeŋgö yuaigöra eksihim möta körögisigisi aka közölömbuaŋ pati ala bau numbu nemba o köhöikŋaŋgöra eŋololoŋ ahakze. Mi aka silik tosatŋi mewöŋi ahakzei, yeŋgöra mutuk jial aka miaŋgö dop galöm meme keu mi qeljiŋe dumŋe kunbuk kewö jizal: Ambazip silik mewöŋi ahakzei, yeŋön mönö Anutugö bemtohoŋ uruŋe qahö öŋgöme.
22Yeŋön qahöpmö, Uŋa Töröŋan nup memakzawaŋgö ölŋi mi urukalem, sösöŋgai, luai aka ahakmeme ölöpŋi kewö: Lömböt pakpak möta mökösöŋda tosatŋi ala ak eŋgiba ahakmeme sakalakŋi ahakze. Keuŋi misila pöndaŋ wuataŋgömakze. 23Guŋbönjönjöŋ qakŋe tosatŋi ak eŋgiba nanŋini törörök galöm köl aŋgumakze. Ambazip silik mewö ahakzei, yeŋön Köna keu qahö qetalakze. 24Ambazip Kraist Jisösgö buŋaya aka maljei, yeŋön uru sileŋinaŋgö sihim kömbönaŋini bölöŋi aka bölöŋaŋgö urukönöpŋini mi körek Jisösbuk maripomnöŋ algetka mem kömuyöhawa malje.
25Uŋa Töröŋan urunine geiga maljin ewö, ahakmemenini mönö mewöyök Uŋa miaŋön galöm köl neŋgii aka memba malbin. 26Mewö mala qetbuŋa omaŋi neŋgimegö kude kapaŋ köla öne töhön kude aiweliköm aŋgumakŋe. Urubölö ak aŋgubepuköra mönö uruköŋgaŋ kude aka uruöngöp qakŋe kude ak aŋgumakŋe. Mewöyök körögisigisi kude ahakŋe. Mewö. d
Copyright information for
BMU